logo

Geschichte

Dr Wunsch nonere Alte Garde isch scho lang e Aaliige gsii. D Grindig isch denn vo dr Generalversammlig 1972 bschlosse worde.

Zem erschten Obmaa isch dr Fritz Erdin gwäält worde. 1993 het en dr Tomi Caflisch in däm Amt abgleest und em Joor 2007 dr Ruedi Felber. Sit 2014 isch dr Erwin Erdin unsere Obmaa. An dr erschte Fasnacht im Joor 1973, hän mit em Sujet „D Baizer ryssen is ab“ 3 Voordrääbler, 10 Pfyffer, dr Tambourmajor und 6 Drummler mitgmacht. Syt dr Fasnacht 2009 simmer grad dobblet so vyyl Drummler.

Vo Aafang aa het me bschlosse, ass me meegligscht alles wo me fir d Fasnacht bruucht, sälber macht. Bis uffe hittige Daag wäärde so d Larve, mängmool d Ladäärne, s Zeedeldichte und was es sunscht no alles eso bruucht, vo aigene Mitgliider gmacht.

Mit em Stammverain het sich bald emool e tolli Partnerschaft entwigglet. Do derbyy hilft mit, ass mr verschiideni Aggtiviteete zämme dien duurefiere. Syt vyyle Joor hämmer au s Patronat fir s Intäärne Bryysdrummle und -Pfyffe vo dr Junge Garde ibernoo, mit em Zyyl, ass e rächte Goobetisch ka uffbaut wäärde. Es git aber au im Verlauf vom Joor immer wider e Gläägehait zem zämmehogge, so zem Byspiil bi de gmainsame Ständeli.

Ab und zue gitts e glaini Uffrischig, wenn Mitgliider us em Stammverain zuenis iibereträtte. Uff dr andere Syte meegen e Dail vo de eltschte Mitgliider sälber nimme Fasnacht mache. Die finde sich denn aber im „Steggli“ (e bessere Namme isch is noonig yygfalle) und pflääge dr Kontaggt ze de Aggtyyve.

Sälbverständlig isch jewyyls d Fasnacht s Haupteraignis vom Joor. As Alti Garde derfe mr die e glai gmietliger zelebriere, as dr Stammverain. Mir starte im Raame vom Comité und schaffe au immer e Sujet us. Am Morgestraich und am Zyschtig zoobe laufe mr zämme mit em Stammverain. Am Mittwuch zoobe simmer bi dr Runde mit dr Junge Garde au drbyy. Dr Bummel mache mr as Fahrt ins Blaue, ohni Inschtrumänt, die bruuche mer erscht wider, wemmer d Stadt ablaufe.

Uff d Fasnacht 2000 het unsere domoolige Glyggekinschtler, dr Kurt Walter, d Fasnachtsblaggette entworfe, mit em Sujet „Mr kemmen uff d Wält“.

Vo Zyt ze Zyt mache mr au Ussfliig, Wuchenändraisli oder e Dibbel. As Glanzpinggt sin do unseri greessere Raise uusegstoche: No Edinburg zem Tattoo 1992, wo dr Stammverain 60 und die Alt Garde 20 Joor alt gsii sinn. Und 1997 zem 25-Joor-Jubileum vo dr Alte Garde, no New York mit Verlengerig fir e harte Kärn, as Abstächer no Kalifornie. Oder au dr Stärnmarsch uff dr Passwang, zem 35-Joor-Jubileum vo dr Alte Garde. Und im 2013 het me die Alti Garde im Safre-Saal amene gediigene Juubel-Oobe zem 40-Jehrige kenne gseh.