Dupf-Club Basel Jungi Garde
Fasnacht 2023
«Kumm mit mir nach Fantasia»
Belgie, Japan, Basel Mässeplatz,
Frankryych, Hokage und dr Münschterschatz?
D Kombi e glai komisch, wie dr Yann Sommer und «Mia san Mia»
Doch plötzligg merggsch: dasch dr Uursprung für Gschichte voller Fantasia!
Vylly kenne dr Naruto Uzumaki und syny Gschicht.
Dr gröscht Ninja het er welle wäärde, uff das ysch är erpicht!
Um iin goots aber sicher nid in dääre Hischtory,
Sondern um dr Pierruto, wo will dr bescht Fasnächtler syy!
Wie sy japanisch Pendant git är sich zerscht nid so gschiggt:
Schloot und bloost zfescht umme, dass jeede Ton drnääbe liggt!
Glöön und Harlekyne lache, wenn sy en in de Gasse gseen,
D Frau Fasnacht schüttlet nur dr Kopf: «Die Musigg ysch nid scheen»!
Dr glai Pierruto bringt so Züüg aber gar nid uss dr Rueh:
Är macht syny Sache wyter und loost nur lächelnd zue!
D Glöön und Harlekyne solle numme wyter reede,
Und ass d Frau Fasnacht langsam bröggelet, das wüssi doch e jeede!
Denn all die Fasnachtsfiguure hänn zämme öbbis gmein:
Sy definiere sich nur über die drey Dääg und sinn mee Schein als Sein!
Frau Fasnacht kennt sich au moll wider e neyi Fryyse gönne,
Denn mittlerwyyle sinn die Hoor wie Stroo, wo gly kennt no brenne!
Mit dääne Gedangge in sym Kopf goot är ind Iebigsstund.
Doch au dört – wär wunderets – laufts bi iim nid so rund.
Am hittige Daag ysch är dr ainzig Bueb im Unterricht,
Und kriegt dorum im Pfäffergässli acht kuum ain z’ Gsicht!
«Glunge», dänggt är sich, wäärend är zem Märtplatz goot,
Är segglet, s braut sich öbbis zämme, gumpt in 6er wo grad dört stoot.
«Nächster Halt: Clarastrasse», verkündet die Computerstimm,
Alles no normal bis jetzt, hebet euch fescht s wird erscht no schlimm!
«Messeplatz, Place de la Foire, Exhibition Square»
S Tram faart ins Herzog-De-Meuron-Rund, dr Schock, dä trifften en schweer!
Die Fasnachtsfiguure wonen usglache hänn, stöön dört in Reih und Gliid,
Was isch denn loos, dänggt sich dr glai, verstoots im Momänt grad nid!
Wie Zombies sinn sy imme Bann, fixiere d Halle ains!
Die Maischte traage Kimonos, e Goschdymm gseesch e kains.
Langsam dämmerets em, wo sy Bligg d LED-Daafele trifft:
«Kumm mit mir nach Fantasia», stoot dört in grosser Schrift!
Är styygt uss, will kly go luege und merggt wies en aahnezieht,
Doch är weert sich, s will em nid glinge, wie fescht är sich bemieht!
Freywillig sin die Figuure nid dört, was het sy in dä Bann zooge?
Dört, d Frau Fasnacht mit Manga-Fratze, iire Bligg, dä wirggt verlooge!
Y glaub die gueti Daame het d Krytyk kly falsch verstande,
Sy brüücht doch kai komplett neus Gsicht, zem in de Häärze z lande
Und wie genau, das froog y my, mit sperrangelwytoffenem Latz:
Kumm mit mr uff d Fantasia, als Basler Fasnachts-Ersatz?
Klaar die Cosplay-Expo duurt au genau eso drey Daag,
Und Goschdimiert au, was als Argumänt no gälte maag!
Doch luegsch e kly genauer aane, um was me sich bemieht?
Um d Farb im Gsicht, kasch grad soguet inne Gugge im Baselbiet
Und musiziere dien die Mangas aber sicher nid!
Laufe kenne sy zwar scho, aber nid im glyyche Schritt!
Und stell dr vor, die ganz Fasnachtsszene wär in ainer Halle,
Do wurdsch d Majore nümmi ghööre, machem erschte Halt wäggem Lalle!
So oder äänlig, het dr Pierruto dänggt – ka sich däm Bann entzieh –
Är probierts au mit de andere, doch hett ganz deftig Mieh!
Als letschte Usswääg, gubs nur ains, sy Stimmdoon dä ysch barsch,
Us voller Keele schreit dä Binggis: «Morgestraich – Vorwärts – Marsch!»
Und siehe da, alli mache mit, mr glaubes kuum: ysch s woor?
Geboore ischer in dääre Stund: Pierruto, dr bescht Major
Was d Frau Fasnacht aabelangt, jä sy kunnt schnäll drmit klaar
«S könnt mr schlächter goo, y könnt jo Zürchere sy, also alles wunderbar»