logo

Zeedel

 

Dupf-Club Basel Alti Garde

Fasnacht 2017

D Kyneese kaufe  ̶̶̶  wirsch es gsee  ̶̶̶  
no d Fasnacht mit em Comité

Dr Hàn und Seng steen uff em Blatz vom Himmels-Friide doo,
well s bloggd si, ass si kaini Stitz me kenne uuseloo,
wo vyyl beweege, und si au gross uusekemme,
und anderi Kyneese sich nit laischte kenne.
Gäld hän si gnueg ─ es isch d Idee woo fäält,
und dr Tian’anmen-Platz het dr Mao gwäält,
zem Ort, woo d Inspirazzione spriesse
und Stitz in Investizzione fliesse.

Du, sait doo dr Hàn, ych haa grad e Idee:
es git e Fasnacht z Basel ─ ych ha’s am Färnsee gsee!
Dert fyyre d Lyt ganz luschtig, aimool jedes Joor.
I glaub esoo wie deert kunnt das sunscht niene voor.
Gang hool du schnäll dr Yáng doo aane,
denn wänn mir zämme afoo blane
wie mir das Kaff wänn iibernee,
die Fasnacht und das Comité.

Jetz steen dr Hàn, dr Seng und au dr Yáng
doo uff em Tian’anmen-Blatz und studiere lang,
eb si ächt au dr Fáng no sotte haa,
denn dä isch gscheit ─ das isch e guete Maa.
Dä kennt die ganz Wält, und au jede Blatz,
er het au iiberaal e liebe Schatz,
wo iim gärn hilft zem wiider wyter koo,
und d Eerebirger kennt är soowiesoo.

Und soo kunnt denn das Gribbli guet in Basel aa,
doo dräffe si jetz zerscht emool ganz e falsche Maa.
Är isch doo im Regierigsroot – e kaine waiss worum.
Är git sich Mieh und strängt sich aa ─ dumm blybt halt aber dumm.
Doch näbem Morin git’s in Basel wyteri so Gstalte,
wo nyt Gscheits mache usser doo d Regierigsstiehl verwalte.
Si haisse Dürr und Wessels – au nit grad die Beschte.
Die sin au im Regierigsroot und schaffe numme Keschte.

D Kyneese gseen jetz ihr Problem und geen zue deene Heere,
wo Hyet aahän ─ die wisse vyyl und dien dr nyt verweere.
Si dräffe dert e nätte Maa, au dää mit eme Huet,
Er lipft sy Tschäpper und sait frindlig, ych verstand si guet.
Geend doch zem Dupf-Club, dä isch froo, wenn er kaa Manne griege,
und ych versprich eych au schoo jetz ─ dert hän dr au s Vergniege.
D Kyneese sin jetz gligglig und si straale häll um d Wett,
Si loobe au dä Lobi Schälz wo si beloote het.

Jetz informiere si s Dehaim.
Si saage zerscht, es sig no ghaim,
sunscht kennt jo jede Dubel koo,
und wie Du gseesch sin si scho doo!
D Frau Fasnacht isch jetz gääl im Gsicht
und s Comité git Unterricht
im Drummle / Pfyffe uff kyneesisch –
au wenn dr Blebbs doo zimlig bees isch.

E jeede frait sich und git Acht,
as äär joo kaini Fääler macht,
wenn dr Major, wo jetz Kynees isch,
lutt «dr Kynees» rieft, uff kyneesisch!
Und alli zämme ─ wunderscheen –
dä gross ney Marsch denn uuseleen,
ass mänggem e baar Dräänli kemme,
woo äär halt nimme kaa verklemme.

Isch d Fasnacht umme, mien d Kyneese
schnäll wiider haim Probleem goo leese.
Si hän au Haimwee, naimeduure.
und zuedäm sin si uff dr Schnuure
vo deere Fasnacht jeedi Nacht.
Si hän nyt gschloofe ─ numme glacht!!!
Drum geen dr Hàn, dr Seng und au dr Fáng
Jetz wiider zrugg uff China mit em Yáng.

 

Archivierti Zeedel: