logo

Zeedel

 

Dupf-Club Basel Jungi Garde

Fasnacht 2018

Mer luege dur die farbig Brille

Y stand im Baadzimmer vor em Spiegel – bi am Dängge
In e paar Stund stoht s neye Joor vor dr Düür – Y haa Bedängge
Wie wirds daasmol koo oder bliibts glych? Me weisses nit
Y loss s Vergangene revue passiere und überleeg was es z brichte git

Y ha s Gfüül, um unseri Wält stoots rächt schytter
Politiker, Wüsseschaftler und Artischte wisse au nimm wie wyter
Si beweege sich uff ere Baan zwüsche absurde Gsetz, oder Benefiz Konzärt
Statt dass sich d Wält um sich sälber drüllt, goots nur um e Wirtschaftsmäärt

Doch jetzt kumm ych mit ere Wältneuheit als Idee
Ums Profitiere gohts drby nümm, per see
Will dr Fokus verschieby vo Gäld und Macht
Zrugg uff d Mame Äärde in ihrer schöönschte Pracht

Vereerti Daame und Heere, es isch sowyt
Dr Technologie e Schritt voruss – s wird langsam Zyt
Zaig ych euch jetzt exklusyv – gang gar nid z wyt
E Brille wies se in dääre Art sunscht niene git

Was macht die Brille speziell – s isch nid dr Raame
Au nid d Form vo de Büügel – traage könne sy Heere und Daame
Vyll eher isch es dur was de aigetlig duesch luege
Will d Gleeser sin rooseroot und d Wält nümm uss de Fuege

Y zaig euch grad wies funggzioniert
Brille aa – Dr Globus mutiert

Y lueg in my Umgääbig – bi am Stuune
Um mii umme verbreitet sich sofort gueti Luune
Anstatt de graue Rauchwolgge uss dr Induschtrii
Seeni Bluemefälder, Eihöörner – e Bilderbuechszenerii

Y lueg in Himmel, gsee e Räägebooge
Lueg noch rächts, dr rooserooti Panther, s isch nid glooge
Dä lauft so nääbe mir häär und pfyfft vor sich aane
E Melodie wie vo Ängeli komponiert – y hätts könne aane

Brille ab – zrugg im Gagg

Im Hindergrund lauft dr Jooresruggbligg vom Schwyzer Fäärnsee
Isch das ächt dr letscht gsii? D SRG gits dänggi bald nümme mee
Denn statt sich mit dr Thematik usenander z setze
Dien gwüssi Lüt lieber geege d Mediefreihait hetze

Und sowiiso, wenn y lueg wär dä Globus diggdiert
Fallt mir uff, do sin die Maischte schytter frisiert
Drmit mein y die Wundermääne uss de Staate
Oder die schwarzi Strääne vom Kim Jong Un(taate)

So willys nümm ha
Legg d Brille wider aa

Lueg: plötzlig sin die bööse Buebe gar kei Gstöör
Will statt Hass z schüüre, verduudle sy d Zyt bim Coiffeur
Und uss däm türkische Diggdatoor ka öbbis wäärde
Uff sym Bio-Buurehoof hietet äär sy Geissehäärde

Eso faabelhaft hani d Wält no nie vernoo
E simpli Brille und scho bisch doo
Wo de kasch uff de Eihöörner ummerytte
Oder au eifach spaziere, Sytte an Sytte

S git kaini Zwäng und kaini Noorme
S einzig Probleem vo Euroopa wäre d Roaming Refoorme
Vo Grieg und Gwalt mien mir erscht gaar nit reede
Es gäb gnueg vo allem, für alli und jeede

Begänn mir uns denn in Nooche Oschte
Wurd dir das nümm dy Lääbe koschte
Zwüsche Määrt, Kameel und verschleyerete Daama
Driffsch zum Käffele dr Sidi Abdel Assar vo El Hama

Au d Bildig veränderet ihr Wääse
S goot nümm um s Rächne, Schrybe, Lääse
Kai Züügnis und kei Bricht wird dir uff e Schuelbangg gnallt
Do kasch dii entwiggle, noch Interässe grad wies dir gfallt

Verliere alli soziaale Meedie iire hooche Wäärt
Denn hett sich dr Homo Sapiens drgeege bewäärt
Dr Mensch blybt Mensch, kommuniziert mitenand
Argumentiert nid geege, sondern fürenand

S lütet luut grad s Delifoon
Fertig mit dr Projeggzion

Plötzligg wird ych uss em Dräumli grisse
D Wält isch immerno glych verschisse
S schreyt mir ein ins Oor und froggt my won y sygg
Biz verwirrt und nääb de Schueh mach y mi schygg

Uff em Wääg zum Fescht liggts mir schwäär uff em Maage
Was hani grad erläbt – wie ischs zu däm koo,
und sowiso könnti sone Brille überhaupt traage?
Frooge um Frooge brenne in miir wien e Füür
Ka uff se au kei Antwort gää – lüt an dr Düür

Kurz vor de Zwölfe kunnt mir s Erläbbte wider in Sinn
Doch jetzt zerscht mol uff s Neue Joor aastosse – Chin Chin

Y richt mir my spitzig Partyhietli – s gseet uss wien e Horn
Dängg: an d Entwiggligg vo dr Brille machi mi scho no –
au wenn erscht Übermorn!

Archivierti Zeedel: