logo

Geschichte

Fasnächtler us em neue Morgartequartier hänn sich zur Gründig vonere neue Gligge zämmedo. Unter dr Laitig vom Max Hediger isch an dr Gründigsversammlig vom 26. Mai 1932 im Restorant Hopfekranz dr Dupf-Club gebore worde. An dr Generalversammlig vom 17. Juni drufabe, hett me dr erscht Vorstand bstellt. Denn hetts afo hektisch wärde. d’Statute und e Fasnachtsreglemänt sinn ufgstellt und e Sparkasse eröffnet worde. Me hett dr Name Dupf-Club gwählt, im Sinn vo dupfe, uf ebbis zaige, e Sujet usspiele. S’Verainsabzaiche isch no hitte e grosse Wurf und modärn.

Die erschte Vereinsjohr sin vo dr Krise und vo dr Arbedslosigkeit präggt gsi. Um zu Gäld zko hett me flyssig Fäld- Wald- und Wiesefeschter und au Pryyskaigle verastaltet. Scho im zwaite Verainsjohr hett me die erscht Johresfyr im Sans Souci duregfiert. Langi Johr isch das e Grossereignis gsi in Basel, bis es schliesslig vom Färnsee verdrängt worde isch. E erscht Dupf-Club Verainsblettli isch us Mangel an Inseränte bald emool wider igange.

Im Johr 1933 hett me zum erschte Mool Fasnacht gmacht, näbenem Spiel hänn 3 Vorryter und e Wage zum Zug ghert.

Im Johr 1936 hett dr Dupf-Club die Jungi Garde und e Drummelschuel igrichtet. 13 Tamboure hänn scho an dr Fasnacht druf mitgmacht, 1938 isch denn au d‘ Pfyfferschuel drzue ko. 1941 hänn die junge Drummler am Monstre-Drummelkonzärt mitgmacht, suscht isch während em Grieg dr Gliggebetrieb reduziert gsi. 1947 isch es denn aber wider losgange und die Ketti isch nie me abgrisse. Mitmache könne Buebe, e Instrumänt leere oder as Vorträbler. iebe duet me im Käller Pfäffergässli 8. Me wird ins Fasnachtsläbe igfiert und pfläggt ganz allgemein e gueti Kameradschaft. Im Alter vo 18 Johr ka me denn in Stammverein übere trätte.

Ändi 1939 isch denn dr Grieg usbroche, was unseri Verainstätigkait igschränggt hett. S’Fasnacht mache uf dr Stross isch verbotte gsi, numme d’Drummelkonzärt im Kiechli sinn no duregfiert worde und vo zwai, bis ändi Grieg uf 7 Vorstellige agwaggse. Dr Dupf Club isch gross useko, woner as ainzigi Gligge 1941 e grossi Latärne uf d’Byyni brocht hett, die isch denn au an dr Fasnachtsusstellig 1945 in dr Kunschthalle usgstellt worde. Do und dert sinn au in Sääl Fasnachtseebe ufko wo me hett kenne drummle und pfyffe. Wenn das au nonem Grieg bald wiider ufgheert hett, so sinn si doch e Vorbild worde, fir die spötere Vorfasnachtsverastaltige.

Die erschti Fasnacht 1946 isch denn e gwaltig Eraignis worde und hett unsere Mitgliiderbestand enorm ind Heechi triibe. Das hett is nid guet do und hett, an Stell vonere Fyyr zum 15 jäärige Jubileeum, zur Spaltig vo unserem Verain gfiert. 20 Mitgliider hänn gschlosse in Barbaraclub gwäggslet. Will aber s’Inträsse an dr Fasnacht allgemein gwaggse isch, hänn mer is vo däm Schogg bald wiider erholt.

Unser Hauptereignis isch jedes Johr d’Fasnacht. Langi Johr hämmer no 2 – 5 Vorryter ka, bis mer d’Haftpflichtprämie fir d’Ross nimme hän kenne zahle. No ainigi Johr lenger hett unsere Zug au immer e Wage drby ka. Dä isch is zwar lieb gsi, will er e Schallmuure bildet hett gege Guggemuusige wo hinter uns gschränzt hänn. Me het en denn trotzdäm ufgää, will dr Ufwand zgross worde isch. Am Drummeli sin mer am Aafang aifach, aber mit pfläggtem Drummle und Pfyffe ufträtte. Hitte hett sich das zunere usgfyylte Bühnischau entwiggled.

Syt 1945 hänn mer au e Gliggekäller. Zerscht an dr Augustinergass 3, denn an dr Freiestross 59 bis 1950. 1952 simmer denn ans Imbergässli 22 zoge, spöter isch das Huus renoviert worde und s’Gässli hett e neue Namme biko, mir sin jetz am Pfäffergässli 8. In erschter Linie bruche mir dä Käller für d’Kursbetriib und Sitzige, aber mer dien au gärn aifach zum Feschte zämmesitze.

Vo 1937 a hämmer au Fraue und Maitli in unseri Pfyffergrubbe ufgno. Mir hänn is dozmol as Vorkämpfer und modärn verstande, notabene ebbe 35 Johr friener, as in de Basler Schuele d’Koedukation ygfiert worde isch. 1943 hämmer sogar Krach gschlage, will am Pryyspfyffe vo de Basler Bebbi kaini Maitli zueglo worde sinn. Wäge unsere Pfyfferinne simmer vo de andere Gligge gschnitte, und au öffetlig und in dr Zyttig verhöhnt worde. Das hett nadyrlig au unter unsere Mitgliider zu ständige Spannige und Diskussione gfiert. Die Frog isch denn im Johr 1968 ändgiltig entschiide worde, syt denn hetts im ganze Spiil numme no Männer und ab 1996 gilt das fir alli Aktive. Hüt simmer aini vo de letschte raine Männergligge.

Sporadisch hänn mer an Tambourefeschter mitgmacht, sin an Fasnachtsverastaltige in Carsbach und Nancy zoge, aber au an die internationale Spiilmannsträffe no Colmar.

Raiseziil fir gresseri Abstächer sin Paris (1937), Wien (1950), Edinburg (1992) New York (1997) Prag (1999) Hamburg (2007) und Stuttgart (2012 )gsi.

1972 hett d’Gründig vo dr Alte Garde stattgfunde. Drummler und Pfyffer us em Stammverein wo 40 Johr alt sin könne in die Alti Garde übere ko. Vorträbler nämme mer au vo usse. Dänggt isch, as me d’Fasnacht ufe gmietligi Art will verbringe. Es isch e änge Bezug zum Stammverain, vieli Aktiviteete betriibe mer zämme.

Stamm, Alti und Jungi Garde mache fir d’Fasnacht viel sälber, speziell d’Larve. Mir hänn au aigeni Muusig. Scho in dr Afangszyt hetts dr „Schuss“ gä, wo as Dupf-Club-Gruess dänggt gsi isch. Denn hämmer as Drummeltäggscht dr „Letkiss“ und dr „Musketier“, as Jubileeumsmarsch dr „Pierrot“ und speeter sinn no dr „Bolderi“ und dr „Peppino alias Ammedysli“ derzue ko.