logo

Zeedel

 

Dupf-Club Basel Stammverein

Fasnacht 2018

Jeemer naai, e Gryyse

Prolog
Mii drifft s ganz sicher nie. My Stell isch sicher sicher.
Aaber mänggmool froog y mii ganz still: Bisch sicher?
Wil sicher isch hittigsdaags laider so vyyles nimme
Wenn de im Haifischbeggi vom Profit duesch schwimme.
Nit vyyl mee Gwinn, nur lyycht styygendi Aktie-Bryyse.
Me muess spaare und entloo! Jeemer naai, e Gryyse!
——
Em DCB goot s nit guet – aigedlig gaar schlächt,
D Keschte zaale mer mee schlächt als rächt.
Miir bilanziere numme Gwinn vo 2500 Frangge,
Jeemernaai, e Gryyse! Miir sinn am wangge.
Wenn s esoo wyter goot, geen mer Banggrott,
Und das wäär eppis, wo nit wiirgglig aine wott.

Fir uns z saniere – s isch e jeedem glaar,
Bruuche miir e frisch backene Finanzestaar.
Uss dr HSG – mit Summa cum Laude versee
Kunnt die allergreescht Sau – ojeeminee.

Anno doozmool – ych waiss es no ganz gnau –
Stoot im Cliquekäller uff aimool die groossi Sau.
Die Sau hett gsoffe, sich dr Ranze brächtig gfillt,
Und dr Clique denn e saumäässige Plan enthillt:

Dr DCB syyg defizitäär, z weenig elitär, vyyl z dyyr
Unser versoffe, alt Image syyg em nit ghyyr.
E Portfolioanalyse haig folgende Punggt ergää:
Dr DCB muess jetz e «Crisis Manager» ibernää!

Fir daas Amt wäär äär die allerbescht Sau, kai Froog.
Was äär denn koschte däät? Was fir e dummi Froog.
E Sau in schwarzer Schaale macht scho no Yydrugg.
So «Knowledge» zaalsch nit mit Bons fir d Ryybrugg.

Äär gseet ämmel so mänggs Spaarpotenzial bim DCB,
So vyyl unnutzi Uusgoobe haig äär jo no gaar nie gsee!
E gnaui EBIT-Analyse haig e z hooche Öxligraad ergää,
Uff dää Schogg haig är grad e Gleesli Wysse miesse nää.

Au unter em Joor kennt me d Keschte optimiere,
Und d Iebigsstunde wirkligg drastisch reduziere.
D Instruggtoore belaschte s Budget – s isch doch woor
E Fäärnkurs, wo jeede sälber zaalt, gseet är vor.

S Humanpotenzial syyg nit grooss – so Pi mol Duume.
Ganz vyyl Dambuure, aaber glyych kai grooss Volume.
D Fällschtryycher wäärde ersetzt – die Ydee loot sich gsee –
Mit zaaligsgreftige Faasnachtsduurischte uss Iibersee.

Und d Pfyffer bloose zwoor, aaber nur schreegi Deen
E Broobleem, wo mir nit gseen, s isch nimme scheen.
D Pfyffer wäärde duur Roboter ersetzt – kai Witz! –
Deen vo me «Midi-File» kemme ebbe scheen spitz.

Dr Voordraab kenne mer grundsätzlig grad stryyche,
Die laufe ee nur vooraa als wääre sii bsoffeni Lyyche.
Stäggeladäärne schwangge, d Schritt sinn z kurz
Dr Voordraab syyg dr Hauptgrund fir e Aktiesturz.

Die Sau in Schaale luegt ganz scheen grimmig dryy:
Bi de Keschte fir d Faasnacht kennt me besser syy!
Goschdyym diräggt uss China, daas wurd sich loone
Und derno hättemer kaini Terminkollisioone.

Ässe an dr Faasnacht git s numme im Bruune Mutz,
S Dringge zaalt jeede sälber, esoo spaare miir Stutz.
Und z Morgge git s noonem Moorgestraich im Käller,
Au deerte gitt s – und zwoor ganz ginschtig – Appezäller.

Jeedes Joor e Faasnacht, aigedlig syyg alles z dyyr,
D Bilanzierig vo de Faasnachtskeschte sinn em nit ghyyr.
Neii Lampe. Neie Zeedel. Neie Zuug. Kai Rendite!
Denn gäbt s erscht no jeedes Joor e neii Internetsyte.

Unser Image syyg verstaubt, s syyg laider esoo,
Drum haig äär statt em alte fir uns e nei Logo.
Daas repräsentiert denn unser nei Clique-Leitbild:
DCB – sportlich, traditionell, jung und wild!

Me miesst neii Saite uffzie, duet d Sau sinniere
D Cliquemitgliider miesst me mee konditioniere!
Wäär d Batterie nit us em Kopfladäärnli nimmt,
Wird jetz mit Faasnachtsbiitrag-Erhööchige trimmt.

Jeede wone Böggli kabutt macht, gspyyrt Konsequänze,
Mer dien d Uffdritszyt am Drummeli staargg begränze.
Kai Insolvänz, duur neii Strängi – esoo muess es syy,
Und mit em neie Logo syyg au e neie Wind derbyy.
D Erfaarig zaigt: Spaare muesch, suscht git s e Schogg
Und mer wäärde vonere «Cash Cow» zem «Poor Dog».

Und spaare; Mer wisse s: Kaa me bim Personal.
Dangg em saumässige Sozialplan wird s nit fatal.
D Pfyffer butze mit iirem Butzer, s wäär jo ydeeal.
Au d Dambuure schaffe im Käller: Spaarpotenzial!
Die wo gar nyt kenne? Nit emol s Bstegg abryybe?
Jää guet. Die mien halt denn dr Zeedel schryybe!

Mit däm Rettigsplan saniere miir dr DCB komplett,
Und dää wenig Gwinn mache mer esoo ganz wett.
Die Gryyse iibersteen mer, du wirsch es gsee.
Gäld hänn mer denn gnueg, was wottisch mee?

Esoo e Clique muess gfiert wäärde und zwoor richtig,
Dr Spass syyg sekundär, d Oornig syyg ganz wichtig.
Restruggturiere mer dr DCB, sinn mer schlau
Und doorum bruuche miir iin, e richtigi Sau!
——
Epilog – e Stoossgebätt vom DCB
Oh liebi Sau, du Retter in Noot.
Dringg Wyy, schängg uns Brot.
Bring Rendite, bring uns Gwinn,
Mach uns zer Clique-Meertyrerin.
Oh liebi Sau, du Retter in Noot,
Biwoor uns vor em sichere Doot.
Zaig uns dr Wääg, mer wisse nyt,
Sinn aagwiise uff dyyni Hilff ab hit.
Oh liebi Sau, du Retter in Noot,
Du hilffsch em darbende Pierrot
Du waisch, wie me Mentsche hilfft in Noot,
Wil s im HSG-Leerbuech gschriibe stoot.

Archivierti Zeedel: