Dupf-Club Basel Alti Garde
Fasnacht 2023
Uns isch unwool!
Liebi Menschinne und Mensche, es duet is laid,
so goot s nimm wyter, hänn mir is gsait,
mir mien do in aller Scheerfi broteschtiere
und is glaar vo dääre Fasnacht dischtanziere.
Mir finde dä Bruuch nämli gar nimm so guet,
well är sich kulturell aaeigne duet
und sich zue allem aane mit beesem Spott
uff Keschte vo andere beluschtige wott.
Vor allem Goschdyym und Laarve sinn fataal,
drunter verschwinde Hemmige und Moraal,
und me nimmt fremdi Ydentideete aa,
ooni derfiir e Erlaubnis z haa.
Kai Waggis het jee e Elsässer gfroggt,
eb s iin nit gruusig bloggt,
dass me iin als versoffene Biezer zaigt,
wo zmitts im Gsicht e gwaltige Zingge drait.
Oder het jee ain vomene Zircher wisse welle,
eb s rächt isch, dass me iin in e Liecht duet stelle,
wo bräggt isch vo lauwarmer Luft,
wo usere riisige Schnuure pufft.
Ouh, und eppis hätte mir fascht vergässe,
uff das isch e gerächti Wält kuum versässe,
denn es git jo no Männerglygge, was firchterlig steert,
denn vo LGBTQI hänn die jo no gar nyt gheert,
hänn bi dr Glyychberächtigung vellig versait,
sinn numme e Huffe toxischi Männligkait,
wo statt Sanftmuet und Verständnis z zaige,
maine, dass si grausaam diggi Aier haige.
Und wenn sich die Männer denn no gedraue,
sich z goschdymiere als Fraue,
isch das sexuelle Raub, e kriminelle Aggt,
drumm isch is unwool, sin vom Entsetze paggt.
S Nivoo vo de Männerglygge isch e Fiasko,
me froggt sich: Wie dief abe singge kas no?
Aber s wird laider z befirchte syy,
das goot dene Fasnächtler am Arsch verbyy,
die wärde wyterhin beesi Schüsche wääle,
um Unschuldigi und Politiger z quääle,
und das syyg Wältkultuur, sait d UNESCO.
Welles Gremium isch denn uff dä Furz koo?
Sicher e Huffe korrupti Männer, alt und wyss,
die mache mit Bedängge kuum e Gschyss,
mache s wie d FIFA, die Walliser Mafia-Filiaale,
pfyffe uff Menscherächt und leen sich gärn zaale.
Unerträägligg, wie me unseri Gfiel verletzt,
was uns in e mega Unwoolsyy versetzt,
schlimm, wie d Fasnacht d Kultuure misshandlet
und die soziaali Harmonyy verschandlet.
Drumm broteschtiere mir, denn dä Karnevall
isch e absolut dringende Sanierigsfall,
und mir gänn Zunder, was hesch was gisch,
bis d Fasnacht nätt und lieb woorde isch,
und unseri hailigi Missioon ändet erscht,
wenn drei Daag trischti Korräggthait herrscht.
Oder e Laarve mit digge Lippe und schwarzem Gsicht,
kai Sau reggt sich uff oder goot vor Gricht,
derzue umme Ranze e Reggli us Bascht,
aifach schregglig, do keerble mir fascht
voor luuter Unwoolsyy und Wuet,
und frooge is, wiesoo denn kaine yygryffe duet.
Zem Gligg sinn d Russe nit grad in Moode,
au d Chineese verliere glaar an Boode,
was is voorsichtig d Hoffnig schänggt,
dass niemert an soone Süsche dänggt,
denn dr Ping und dr Puting, die baide hätte
geege d Fasnacht glatt e Grieg losdrätte.
Drum gheert s schlichtwägg verbotte,
iber fremdi Kultuure z spotte,
sogar zu de Araber sett me nätt syy,
wo sunscht kauft me no Gas und Eel yy,
jä, Reschpäggt und Aggzeptanz isch neetig,
das isch die modärni Form vo Ethig,
drumm syyged »woke« und schnäll still,
looset, was unseri Botschaft saage will:
Aigedlig sinn mir jo alli glyych,
eb gääl, schwarz, arm oder ryych,
eb mir hetero oder homo sinn
oder irgendnaime zwischedrinn,
eb wyss, bruun, au grien, das goot,
am beschte ganz linggs und root,
egaal eb verglemmt oder pervers,
Hauptsach d Wält isch divers.
Also skandiere mir luut und radikaal:
D Fasnacht e Skandaal, unkorräggt und unsoziaal!
D Fasnacht e Skandaal, unkorräggt und unsoziaal!
D Fasnacht e Skand … äh …
Und erscht d Schwoobe, die arme Sieche
(das sinn die grad ääne an Rieche),
duet me uff s greebschte desavouiere,
was mir glaar als Rassismus klassifiziere.
Irr miend verstoo, dass is das Unwoolsyy beraitet,
schliessligg sinn mir empfindsaam und zartbesaitet,
wintsche, dass allne Gerächigkeit duet widerfaare
und wänn jedem Diskriminierige erspaare.
Aber d Fasnacht scheert sich drumm e Drägg
und s Comité luegt grossziigi driiber ewägg,
wenn dr Winnetou, die eerehafti Roothuut
(derzue raimt sich iibrigens beschtens Rootgruut),
wird mit falsche Fäädere, Pfyyl und Booge
reschpäggtlos dur dr Gaggoo zooge,
und was is au so gruusig duet schogge
isch die bekiffti Figuur mit filzige Logge.
Sells e Jamaikaaner syy? Oder aine vo deene,
us dääre linggs-autonoome Szeene?