Die Alti Garde vom Dupf-Club isch Anno 2022 50 Joor alt worde!
Das sinn mir:
die Alti Garde vom Dupf-Club.
Die Alti Garde vom Dupf-Club isch an dr GV 1972 gründet worde und im 1973 s’ erscht mool zämme am Cortège gloffe.
Bi dr Alte Garde goht’s e weeneli gmietliger zue als im Stammverein. Grundsätzlig seit unsere Leitspruch «Mir mien gar nüt!». Das heisst aber nit, dass mir nit aggtiv sinn – im Gegedail: Mir hänn vyyl Aggtiviteete zämme, wo mänggmool au nüt mit dr Fasnacht z’ tue hänn. D’ Kameradschaft wird bi uns nämmlig sehr hoch gschriibe!
Unseri Statute kasch do aaluege.
e baar Fötteli vo dr Fasnacht 2024
e baar Fötteli vo dr Ladärne 2024
Mehr über die Alti Garde
Wär ka alles in die Alti Garde?
In die alti Garde ka-me ab em 40schte Altersjoor. In dr Regel (und am liebschte) uss unserem Stammverein.
Queryystyyger sinn aber au willkumme. Die mien allerdings mindeschtens eimool mit uns Fasnacht gmacht ha, bevor mer si an dr näggschte GV definiv uffnäh könne.
Unseri Iebigsstunde
Immer am Zyschtig zoobe iebe-mer gmeinsam, also Pfyffer und Damboure zämme, zwüsche 19:45 und 21:30 im Cliquekäller vom Dupf-Club am Pfäffergässli 8.
Au wenn mir uns nümme unbedingt für Drummel- und Pfyffermeischterschafte dien aamälde – unseri Inschtrumänt wämmer trotzdäm guet spiile könne und nämme das sehr ärnscht. Denn mer wänn an dr Fasnacht e aaständigi Schnuure mache! Zem Glügg hämmer e guete Pfyffer- und Drummelchef!
Und das isch übrigens unser Repertoire (Stand Friehlig 2024)
Und noh de Iebigsstunde höggle-mer immer no Zytli zämme, blaudere und dien au no öbbis Feyns ässe, wo-n-ys dr Källermeischter bröötlet hett.
Köschte als Mitgliid und pro Fasnacht
Als Mitgliid vo dr Alte Garde vom Dr Club zahlsch numme:
Aggive-Mitgliiderbyytrag: CHF 75 pro Joor
Fasnachts-Byytrag: CHF 400 pro Joor, und do isch s’ Goschtüm, d’ Larve (uss eigener Produggzion!), s’ Zmorge am Morgestraich, d’ Nachtässe am Fasnachts-Mändig und -Mittwuch yygschlosse.
Bummel-Deilnahm: CHF 120, inkl. Zmittagässe.
«Corpsmaterial»: S’ Pierrot-Goschtüm, d’ Larve und s’ Kopfladärnli bikunnsch als Leyhgoob, wenn-de Aggtivmitgliid bisch.
Passiv-Mitgliiderbyytrag: CHF 30 pro Joor.
Die nit eso ganz kurzi Gschicht vo dr Alte Garde
Dr Wunsch nonere Alte Garde isch scho lang e Aaliige gsii. D Grindig isch denn vo dr Generalversammlig 1972 bschlosse worde. Zem erschte Obmaa isch dr Fritz Erdin gwäählt worde. 1993 het en dr Tomi Caflisch in däm Amt abglöst und em Joor 2007 dr Ruedi Felber. Zwüsche 2014 und 2022 isch dr Erwin Erdin unsere Obmaa gsii und sythäär dr Robi Appel.
An dr erschte Fasnacht im Joor 1973 sinn mit em Sujet «D Baizer ryssen is ab» 3 Voordrääbler, 10 Pfyffer, dr Dambourmajor und 6 Damboure yygstande. An dr Fasnacht 2024 wärde 11 Voordrääbler, 16 Pfyffer, dr Dambourmajor und 8 Damboure mitmache.
Vo Aafang aa het me bschlosse, ass me meegligscht alles, wo me fir d Fasnacht bruucht, sälber macht. Bis uffe hittige Daag wärde so d Larve, mängmool d Ladäärne, s Zeedeldichte und was es sunscht no alles eso bruucht, vo aigene Mitgliider gmacht.
Mit em Stammverain het sich bald emool e tolli Partnerschaft entwigglet. Do derbyy hilft mit, ass mr verschiideni Aggtiviteete zämme dien duurefiere. Syt vyyle Joor hämmer au s Patronat fir s Intäärne Bryysdrummle und -Pfyffe vo dr Junge Garde ibernoo, mit em Zyyl, ass e rächte Goobetisch ka uffbaut wäärde. Es git aber au im Verlauf vom Joor immer wider e Gläägehait zem zämmehogge, so zem Byspyyl bi de gmainsame Ständeli.
Ab und zue gitts e glaini Uffrischig, wenn Mitgliider uss- em Stammverain zue-n-ys iibereträtte. Uff dr andere Syte meegen e Dail vo de eltschte Mitgliider sälber nimme Fasnacht mache. Die finde sich denn aber im «Steggli» (e bessere Namme isch is noonig yygfalle) und pflääge dr Kontaggt ze de Aggtyve.
Sälbverständlig isch jewyyls d Fasnacht s Haupteraignis vom Joor. As Alti Garde derfe mr die e glai gmietliger zelebriere, as dr Stammverain. Mir starte im Rahme vom Comité und schaffe au immer e Sujet us. Am Morgestraich und am Zyschtig zoobe laufe mr zämme mit em Stammverain. Am Mittwuch zoobe simmer bi dr Runde mit dr Junge Garde au drbyy. Dr Bummel mache mr as Fahrt ins Blaue, ohni Inschtrumänt, die bruuche mer erscht wider, wemmer d Stadt ablaufe.
Vo Zyt ze Zyt mache mr au Ussfliig, Wuchenändraisli oder e Dibbel. As Glanzpinggt sin do unseri greessere Raise uusegstoche: No Edinburg zem Tattoo 1992, wo dr Stammverain 60 und die Alt Garde 20 Joor alt gsii sinn. Und 1997 zem 25-Joor-Jubileum vo dr Alte Garde, no New York mit Verlengerig fir e harte Kärn, as Abstächer no Kalifornie. Oder au dr Stärnmarsch uff dr Passwang, zem 35-Joor-Jubileum vo dr Alte Garde. Und im 2013 het me die Alti Garde im Safre-Saal amene gediigene Juubel-Oobe zem 40-Jehrige kenne gseh.
Uff d Fasnacht 2000 het ibrigens unsere domoolige Glyggekinschtler, dr Kurt Walter, d Fasnachtsblaggedde entworfe, mit em Sujet “Mr kemmen uff d Wält”. Und fir d Fasnacht 2021 hett-er mit dr Blaggedde «Basst s no?» grad noochedopplet.
Kontaggt mit em Obmaa vo dr Alte Garde
obmaa.ag@dupf-club.ch, 079 663 08 41
Alli Sujets, wo die Alti Garde bis jetzt kha hett
1973 D Baizer ryssen is ab
1974 Es Volggsmärschelet iberall
1975 Stimmts?
1976 S Gutzwillers gehen an Birgerzmorgge
1977 D Olympia und die 40 Raiber
1978 Mues y? Derf y? oder soll y? Gurte drage
1979 25 Joor Funggekino
1980 S neye Rächt firs schwache Gschlächt
1981 Bruchts z Basel e Birgerwehr?
1982 Ferie uf em Burehof
1983 Stohts wirgglig in de Stärne
1984 D Schlacht am Sandgruebe
1985 In Vino veritas
1986 Mir warte uf e Lachs
1987 FCB wie Bättler
1988 Ryssaigling
1989 Wie findsch d Mäss
1990 En Asyl fir dr roti Ma
1991 Basel schlycht Lieschtel a
1992 Räuber Fotzelboscht / Dr gääl Raubzug
1993 The Royal Family is brökeling
1994 Komet är oder komet är nid?
1995 Aizytig
1996 Aadie Dienstbiechli
1997 Edelwyss und Enzian, Schwyzergryz und Rinderwahn
1998 Cash mi gärn ha
1999 My Home isch my Kischte
2000 MUMPIZ Makabere und mysteriöse Idee-Zauber
2001 Äne, Däne, Bisse
2003 Nonem Aaleege wird abzooge
2004 Garantiert – manipuliert
2005 Gell, des isch unser Tell
2006 Rütli-Schwur-Rapport-Krawall
2007 Mir Giftsuffer
2008 Bruchts emänd no e Padänt
2009 Schloote statt Frässe
2010 Bundeshüenerstall
2011 Wyyberlämbbe im Fraueli
2012 Mir wänn jetz nimme steene – s’ git jo no Tschetscheene
2013 Requiescat In Pace – Stärbetourismus
2014 dr letscht Epfel isch gly gfrässe
2015 Guugel – Angscht
2016 Dr Bättelstaat am Bättelstab
2017 D Kyneese kaufe – wirsch es gsee – no d’ Fasnacht mit em Comité
2018 Despotismus Globalis
2019 #Männer sinn Drägg
2020 (abgseit) s Bethli Ackermaa uff dr Suechi noonem vorlorene Grimpel
2021 Kei Fasnacht wäge Corona
2022 Kei Cortège wäge Corona – Charivari
2023 Uns isch unwohl!
2024 Wie Heuschregge schwärme si uss