Mir luege ind Glaskugele

Intro:
Bligg, die saage mehr als dausig Wort
Sigs uff dr grosse Bihni oder au bim Sport
Emotione kasch in dr Auge am Beschte gseh
Ob in dr Nati, bi Rotblau und em ESC
Bligg kasch zruggwärfe, in Gschehniss vo vor langer Zytt,
Das wurddr nid unbedingt roote bringts amme schlächti Emotione mit
An dr Fasnacht sin die Bligg maischtens kaschiert
Duur Larve, vomene Sujet inspiriert
Dä Prozäss zems Sujet finde, y bi ehrligg
Ysch nid numme Fraid und Spass sondern amme au beschwerligg
Do inveschtiersch vyll Häärzbluet und au scho die eint Stund oder zwai
Zem am Fasnachtsmääntig mergge, mit sällem Sujet bisch gar nid ellai.
Au die Fasnacht wirds wie allewyyl zu e baar dopplige koh.
Eso assdedr Sorge mache muesch, zem niene falsch yystoh
Mir sinn drumm im Vorfäld vo dääre Fasnacht uff ebbis ganz glatts koh
Und hänn d Findig vo unserem Sujet dr Magie überloh
Dä Dupf-Club spinnt, dänggsch du dir jetzt, das funktioniert doch nid
Mir hänns gschafft und zeige dirs in vier ganz eifache Schritt

1. Du muesch wüsse wo
Und mit wämmde muesch reede
2. Du muesch über gränze go
Und trotzdäm nid bis uff Schweede
3. Du muesch für d Fasnacht Brönne
Au im hälle gseh wär guet
4. Denn wird dir öbber saage könne
Wär welles Sujet usspyyle duet

Dä Plaan, y gibs zue, dä ysch kly daiflisch
D Verwirrig die wird krass
Wenn mir glyych goschdymmiert sinn wie die Meischte uff dr Strooss und in dr Gass
Daiflisch gfrait het sich au d Person wo uns das phrophezeit
Bi dr Ahfroog heigi sy, Zitat: «Nöd zwei Mal überleit»
Die bees Zwillingsschweschter vo dr Frau Fasnacht findet d‘ Idee ganz digg
Und wirft für uns in ihri Glaskuugele dr Zuekunftsbligg

1. Prophezeiig: Findsch dä klyy, wo do schwimmt im Rhy
D Fasnacht die wurd ganz gewaltig und so farbefroh
Dangge Frau Hällsehere uff die Idee wääremer ohni sy nie koh. «Neii» insistiert sy heige mir dr Conradin nid tanze gseh?
Basel derf sich Gastgäberin nenne vom grosse ESC
Danggere Kinschtlerpersoon, wo letschtjoor im kalte Malmö oobe
Dr Code knaggt het und sich wiene Phoenix uss dr Äsche het erhoobe
Wer suchet, der findet heig ihri Grossmamme immer sinniert
D Schwiz als Marlin het Nemo gfunde und genau doorum reüssiert
Drum wurd die Fasnacht 25 no kly farbiger als sunscht Peace, Love und Sexyness geege dr graui Alltagsdunscht

2. Phrophezeiig: E glaine Maa ganz gross
Wo mir die Wort ghööre, laufts ys kalt dr Rugge aabe
Het äggscht im näggschte Joor dr Eric W. Im grosse Root denn s Saage?
Ob mr nid ganz bache seige froggt sy ys, sy mein sicher nid dä Duubel
S einzig kalte bi dämm Maa, wo sy meint sinn sini Stats und au sy Jubel
E Euphorie löst är denn schnäll moll uss und reedet scho vo Titel Shaq is back, wie domolls dr Alex F. giz äggscht e neus Kapitel?
Z lahm und z uninspiriert in Chicago, das git au uns z dängge Zem sini Kritiker liege stroofe fahrtr jede Oobe uffe Gämpe
Oh Captain, mein Captain, die ganz FCB-Clique danzt nachm Major Shaq sinere Pfyffe
D Dame ka nur nyydloos zuegestoh: «Au mir z Züri hännds begriffe»

3. Prophezeiig: Basel am Ball
Jetzt kunnt die olli Dame aber nid nomoll mitemem Fuessballthema
Mir griffe yy und gännere z verstoh das heigemer langsam gseh gha
Ungläubig, y kas nid andrscht beschryybe ysch dr Bligg vo dääre Dame
«Au d Fasnacht zelebriert das Fäscht vo somem grosse Rahme» Ihre Bligg ganz dief in unsere Auge, Erinnerige wäärde wach An das wunderbaare Fuessballfescht im Summer 2008 Lehmann, Bachmann, Wälti, Crnogorcevic und Sow
Sinn denne vrantwortligg in Basel für die Show
Dr wirkligg Kick-Off fändi aber an dr Fasnacht statt
Uss Basel am Ball, wird Fasnacht am Ball, e ganz eifach Spyyl uffem Blatt

Epilog:
Durch all die Informatione sinn mir kly duure Wind
«E DU, E DU, dasch Ghirnwösch gsy», hallts zhinterscht in mim Grind
Woni d Auge uffmach yschs ganz häll und y blinzle biz
Vor mir stoht e frische Knächt ussem Oschte vo dr Schwiz
E koomisch Käärli, gseht är doch sälber uss, als hättmenem s Hirni gwäsche
Dr Bligg vrruggt dr Keerper zuggt, är längt sin sini Täsche
Är wurdi Unterschrifte sammle gege sälle daiflische Kontescht Ob y gläubig seig, wottr wüsse und sait Jesus ist the Best
Glaube dueni numme nid and Gaischter gib ich ihm denn zverstoh
E Bligg ind Kuugele bewyysts, mir wäärde Schwizermaischter, das kamr so lo stoh
Ob sich die Prophezeiige bewohrheite dien, das gsehmr denn im Meerze
Wenn die erschte Lambbe häll erlüüche duurs brenne vode Kerze
Was ych dir scho jezze prophezeie ka, loos zue, muesch rasch uffhööre schmuuse
Immer wenn e Zircher s Muul uffmacht denn kunnt nur Schissdrägg uuse.