logo

Zeedel

Dupf-Club Basel Jungi Garde

Mir sin unseri aigene Voorbilder

Lyycht verstaubt, nach zwaine Joor,
Ime Rüümli, hinde im Egge,
Me gsehts fascht nit, es kunnts aim vor,
Als wurds sich welle verstegge

Wenn d Lambbe im Käller ahgeehn
Kasches aber kuum meh yberseeh:
S veielett-gääle Frindschaftsbuech
Vo unserem DCB

Syt 1932 findsch e jede Pierrot – sogar Pierrotinne – dinn
s käämt aim hytte nym in Sinn!
Zerscht nur schwarz-wyss, doch pletzligg gits au farbigi Fetteli zgseh:
Jöö lueg au do, dr jung Robi Schärz, trait scho s Hietli vom Comité!

Dä diggi Schungge dä umfasst e ganzi Hischtorie:
E gschichtlig Artefaggt mit Aura, Glanz und Glorie!
Wie e jeedes Diddl-Fryndschaftsbuech, kasch ze allem ebbis schryybe
Lieblings-ässe, -farb und -länderbsuech, d Lieblingszahl bi vyllne: siibe

Y will euch mit myne Uusfiehrige, au gar nimm länger steere,
Drumm konzentrieri my numme no uff ai Punggt im Buech,
und vrezell eich, wasser wännd gheere:
Dä ominösi Punggt, jetzt wartet rasch das ysch nid s Lieblingsgool,
S handlet sich ums Vorbild, uff Neyditsch au s Idool!

Das Biechli isch nid numme voll mit Schauspiiler und mit Schtaare,
Sängerinne, Drummelkeenige und Schütteler in Schaare,
Wennd bletterisch, muesch nid lang sueche, s fallt uff dass amme
Dr Babbe findsch und dr Dozänt und oftmools au no d Mamme!

In d friehne Zweidausger hesch die zwaiti rotblau Wälle,
Vorbilder sin Jimmy, Rossi und dr Zubi mit synere Gälle
D Joor ziehn duure, y versingg im Buech, doch pletzligg wirdsmer schytter:
Zwai Fasnachtsjoor hets kainy Yytraag gäh, y weiss wirkligg nimme wyter!

E innere Kampf braut sich in mir zämme, mi Keerper, dä rumort,
S wirdmer schwarz vor Auge, y schrey drumm noch Support!
Die digge Wänd vom Källergwölb verschlugge mini Rief …
Basel ooni Fasnacht – Jä dää Schogg, dä sitzt dief!

D Oonmacht die ergryfft mii und y verfall in e Narkoose
Gsee Damboure trummle und Pfyffer in s Piccolo bloose!
Y lueg uff d Uhr und bi verwirrt, es isch dr 7. Meerze!
Vom Joor Zwaidausigzwaiezwanzig, kei Saich, y bi doo nid am scheerze!

Wiene Gaischt schwirry um dr Dupf-Club und syni Jungi Garde:
Sy steen grad yy vorem Pfäffergässli und kennes kuum erwarte!
«Pierrot, Vorwärts, Marsch» erteents, jetzt laufe sy scho loos…
In wunderbaare Goschdym und Larve – ai ysch das famos!

Stolz und voll Elan lauft dr Vordraab vornewägg,
Und wie sich das so gheert, hänn sy d Zeedel im Gepägg!
Y will mr ain go hoole, doch do ischsmer nimm ganz gschmuech:
Die Zeedel, jä y kas kuum glaube, sinn die fäälende Sytte vo däm Buech!

Do wirdy jo ganz gwunderig, waas sy dert inne schryybe!
Jöö lueg au do, ein sait, är will für immer Düpfler blyybe!
Was mii jetzt interessiert, y glaub dasch allne klaar:
Wär hänn die Buebe als Vorbild gnennt, und kennen au, dä Schtaar?
Doch sehr schnäll wirdmer klaar, mir lääbe jetzt inere andere Wält!

Doch was het das au z bedytte, y froog bim erschte vo de Hält,
E Jeede nennt sich sälber, do entdeggi ains vod däne e Schilder:
In grosse Lettere stoht dert druff:
MIR SIN UNSERI AIGENE VOORBILDER

Do bruuchy e weeneli Noochhilf und lauf grad zem Dambourmajoor,
Är leggt dr Pierrot ab und erkläärt mr dr Wandel vo dr Joor:
«Du muesch wüsse», saitermer, und aagschbannt loosi zueh,
«Was mir bruuche, sinn nid Idool, sondern wanderfeschti Schueh»!

«E jeede vo uns Düpfler muess dr aige Wääg beschrytte!
Das schaffter nur mit Unterstützig, denn mir gönn Sytte an Sytte!
Nach dääre eender schwääre Zyt, do ysch das essentiell,
Assmer uff ys luege wie synerzyt d Hedwig uffe Willhelm Tell»

«Denn mir sinn d Zuekunft vo dämm Laade», nennter s Kind bim Naame!
«Drumm gstalte miir die Fasnachtsdääg, in unserem aigene Raame!
E jeede moolt sy Pierrot ah und zwar so winärs will»
Woni proteschtiere wott, luegter my aa und sait nur «chill!»

Au miir goot do e Liechtli uff, y find är het jo rächt!
Do wirdsmer wider schwarz vor Auge und au unhaimlig schlächt!
In Trance-Zueschtänd fyyli my, es haut mi uss de Söggli!
Woni druffaabe zue mir kumm bini wider im Rüümli mit de Böggli!

S Frindschaftsbuech, das ysch jetzt farbig und numme veiellet-gääl,
Die fäälende Sytte, die sinn dinne, in dr Suppe isch ändligg wider Määl!
Y lueg anmer aabe und beruhigt schnuufi yy
Zum Gligg biny no dr alt, y hät jo pletzligg kenne Ziircher syy…

Zum Archiv