logo

Zeedel

 

Dupf-Club Basel Stammverein

Fasnacht 2022

Lueg deert oobe am Himmel…!
Männer und iiri Rageete

 

Ouverture
General, Ständer, Flöte, Glied, Knächt,
Johnny, Hammer, Lanze und Gmächt.
Stängel, Lümmel, Dödel und Macheete
oder ganz aifach: Mi riisegroossi Rageete.

Le premier acte
Ych lueg mii gärn aa uffem Cover vom Spiegel.
Ych lueg mii gärn aa, dehaim vor em Spiegel,
My Bligg wandert vom Kopf bis zem Wampe,
Undeduure – Jesus – hänggt e Wunderlampe.

Du Jungbrunne, du seelig Wääse, du Gott,
Du Maxime vo allem. Du, was e jeedi wott.
Bisch vollkomme und au in dr Schwächi stargg,
Treisch mii, mee als jede Närv im Ruggemargg.

Du bisch revolutionär, legendär, evolutionär
Ooni dii, my morgendligs Ritual ziimlig schwär.
Hogg uff d Schüssle, loss dii gnüsslig hängge,
Kratz mii kurz, due dr no kei Bligg schängge.

S letschte Tröpfli landet sowiesoo in dr Hose,
Radio ahstelle und die leschte News loose.

Fünf mol zäh gitt fuffzig – fuffzig isch noni vyyl,
fuffzig mol zäh isch fünfhundert – no kai Ghyyl!
Fünfhundert mol tausig, langsam e grossi Mängi
Langsam wird s fiecht, in dr Hose und dr Ängi.

Dringg mi Kaffi und byss in mii Wurschtwegge,
D Nochberin duet langsam mii Durscht wegge.
Sie holt d Zyttig, yych lueg miini Aktiekürs aa,
Sii goot zue iirem Maa – ych wär gärn iire Maa.

Le deuxième acte
Pagg my Polschterküssi y, ych lieb mii Donut
Will blaui Eier, nit ahgmoolt, han ych so satt.
Generell isch my Büro total uff mii ussgrichtet,
Ha seer schnälli Store, isch äär mol uffgrichtet.

Ha zwei Desktops, drzue no zwei separati Hard Drive
Für denn, wenn ych mol wieder uff Pole abschweif.
Kei Gürtel, „Stretch-Size“ – ych ha absolut kei Problem
S Fazenettli wägg, bii Onlinesitzige hogg ych bequem.

Mir isch oft langwylig, ych ha scho alles optimiert,
Wär krepiert, ha s frieh kapiert, hett Gwünn maximiert.
Jedi Sekunde zellt, will jedes Päggli wird zuegstellt,
E erotische Gedangge – mii Banane wird gschellt.

In d Buechstabesuppe heig ych numme „P“ drygrüert,
D Doggtere hett gsait, ych sigg pathologisch triibgstüürt.
Das isch viel z tüür, ych halt gaar nyt vo Psychologie,
E Maa isch e Maa und daas wird immer esoo syy.

Le troisième acte
My Ritual, sakral, jede Oobe lueg ych ins Färnroor,
S kunnt gärn vor – und denn hoff ych, s wär woor –
Ass ych e Stärnkonstellation gsee mit mym Antlitz,
Perfäggte Ahbligg. Hösch, ych wird ganz spitz.

Ych ha e goldigs Muul und ych lieb Narzisse,
Uff sozialkrytischs Gschwätz kaan ych schisse.
S Gäld vermehrt sich, ych ha drfir hart gschafft,
Und mir sogar goldige Eierwärmer aagschafft.

S isch genial, my Kapital. Ych kaa alles mache
Im Kapitol partymache oder au e Sau schlachte.
Ych giib mym Rolex-Träger rasch myni Goldketti,
Und dr Töhnies gitt mer d Sau, e bsunders fetti.

Aaber die bescht Idee – die find ych prophetisch –
Und jä. vyylicht erligg ych grad mym Fetisch.
Aber hey! Lueg emool, s schwäbt scho in dr Luft,
Ych schmeggen scho – dr proteinhaltigi Salzduft!

Ych ha alles erreicht do, ha aaber no kei Rageete,
Jehova, Allah, Gott, Payzos, Mask – Prophete!
Ändlig erhebt sich mii Gmächt in s Firmamänt,
Revolutionär erreich ych myni Gottheit am Änd.

L’ acte finale
Ych lueg uffe in Himmel – pompös, orgiastisch,
Mii Ding deert oobe: Aifach nur phantastisch!
Ych mach d Wält besser, das kaa me gsee,
Urinier ych, denn gitts dr n ggscht Baikalsee.

Dominanz markiersch duur Sterggi und Perfektion,
und mit ere technisch hervorragende Erektion.

La finale dramatique
Seelig wachsch uff, bisch froo, bisch kei Maa,
Sust wurdsch jetzt wohl e Morgeständer ha.

Zum Archiv