Zue unserer Junge Garde gänn-mer Sorg, und si isch e wichtige Teil vo uns, denn do lehre si, bis si 18 Joor alt wärde, nit numme s’ Drummle und Pfyffe, sondern au «d’ Fasnacht». Und das heisst vor allem Kameradschaft; bis uffe in die Alti Garde git’s starggi Fründschafte, wo während der Zytt in dr Junge Garde entstande sinn und bis ins hoche Alter aahebe!
Und das dien mir fördere, indäm mer au unter em Joor vyli gleineri und grösseri Aaläss organisiere und enander zimmlig oft könne gseh.
D’ Mitgliidschaft isch offe für Buebe ab 6 Joor. E grosse Wärt lege mir druff, as au d’ Eltere mögligscht aggtiv mitmache, und im Eltereobe stelle mir dä Kontaggt här. Buebe könne Drummle oder Pfyffe leere, aber au im Vortrab mitmache. (Bis si ihr Instrumänt einigermasse marschsicher könne spiile, mache si z’ erscht emool im Vortrab mit.)
Wenn de jetzt uff die farbige Bälgge do undedra gliggsch, kasch alles Wichtige über unseri Jungi Garde gseh. Und au, worum mit überzüggt sinn, dass es dy Bueb bi uns guet hett und Fründe findet.
Sälpferständlig isch uns d’Kameradschaft unter allne Mitgliider sehr wichtig. Im Summerprogramm (ohni Instrumänt) gitts verschiideni Aktiviteete, wo me s’ ka glatt ha zämme.
Im Alter vo 18 Johr erfolgt dr Übertritt in Stammverain. Dä wird sorgfältig vorbereitet, dass sich die Debütante dört nid öbbe fremd vorkömme: An dr Fasnacht lauft die Jungi Garde vyyl mit em Stammverein oder dr Alte Garde – oder, am Morgestreich oder Mittwuch zoobe mit beidene. Das gitt denn immer e riise Zug, wo allene Freud macht.
Schnupperfasnacht
Wär no unsicher isch, was er will und öb überhaupt, ka zerscht emol e ganzi Fasnacht ko go schnuppere. Är bikunnt vo uns denn e Goschdüm und e Larve, damit er im Vortrab voll mitmache ka. Das isch für ihn gratis, und au s’ Zmorge während em Morgestreich und s’ Nachtässe am Mäntig und Mittwuch isch drin inbegriffe!
Nochhär ka dy Bueb sälber entscheide, ob das öbbis für ihn wär und welles Instrumänt är wött lehre. Du kasch dy Bueb übrigens ganz unkompliziert für e sone Schnupperfasnacht aamälde mit däm Formular: eifach ussfülle und grad abschigge. Mer mälde ys!
Leere Pfyffe und Drummle
D’ Iebigsstunde finde in unserem Käller im Pfäffergässli 8 statt, und zwor zue verschiidene Zytte, damit d’ Instruggtore und Instruggtorinne besser uff alli Einzelni yygoh könne. S’ Repertoire umfasst ebbe 10 Märsch und isch mit däm vom Stammverain abgstimmt, damit me au ka zämme laufe.
Nadierlig isch s’Drummle und Pfyffe d’ Hauptsach. Am e äxtra Wucheänd wird do dra ummegschliffe. Es söll kei übertriibeni Perfektion sy, aber es soll jo au guet töne – so macht’s au am meischte Spass.
Am intärne Prysdrummle und -Pfyffe kenne si sich gegesyttig mässe, und für e ryche Goobetisch sorgt syt Johre unseri Alte Garde. Und wärs scho e glai besser ka, dörf sogar am offizielle Pryysdrummle und -Pfyffe mitmache. Do iebe mir aber kei Zwang uss wie bi andere Clique!
Mitgliidschaft und Koschte
D’ Koschte für JG-Mitgliider bhalte mer ganz dief (alles pro Joor: – Mitgliiderbyytrag: CHF 50 – Kurskoschte: CHF 100 – Fasnachtskoschte: 220 – Schnupperfasnacht: Gratis Zuesätzligi Koschte für Tamboure: – Depot Mietdrummle: CHF 200 – Drummelmieti: CHF 50
Fasnacht und Vorbereitige
Wichtig isch es, dass die Buebe au in s’ Ghaimnis vo dr Fasnachtswält yybunde sinn. Alles, was mit em Fasnachtsgaischt zämmehängt, solle die Junge mitbikoh und -lääbe und sotte mögligscht vyyl sälber derzue byytrage. So dien d’ Buebe au ihri eigene Idee zem Fasnachts-Sujet sälber presentiere, ussdiskutiere und denn drüber abstimme! Und nadierlig wärde si aaschliessend unter kundiger Fiehrig für d’ Realisierig vom Sujet sowyt wie möglig mit yybezoge. Übrigens: wie in dr ganze Clique mache mer au in dr Junge Garde unseri Larve sälber! Mir dien au dä Bruuch fördere.
An dr Fasnacht bildet die Jungi Garde e sälbständige Zug, stoht aber am Morgestraich und am Mittwuch zobe zämme mit em Stammverain und dr Alte Garde yy. Für vyli vo de Junge isch dr eigentligi Höhepunkt vo dr Fasnacht!
Die kurzi Gschicht vo dr Junge Garde
Die Jungi Garde vom Dupf-Club isch im Johr 1936 in Form von-ere Drummelschuel gründet worde. 13 Tamboure hänn scho an dr Fasnacht druff mitgmacht, mit em verlorene Schlissel vo dr alte Universiteet as Sujet. 1938 isch den au d’Pfyfferschuel drzue ko, mit luter Maitli und aim Bueb. Aber an dr Fasnacht 1939 sinn si zum mitmache nonig parat gsi. 1941 isch die Jungi Garde mit 13 Tamboure am Monschtre-Drummel-Konzärt («s’ Drummeli» mit dr Drummelschuel ufträtte. E Uffierig, wo übrigens 1951, 1963, 1979 und 1991 au wider stattgfunde hett.
Wärend em Grieg hetts jo kaini Fasnachte gä und s’ Inträsse am Fasnacht mache isch gschwunde. Entsprächend schlächt sinn die Kürs bsuecht worde, hänn aber immer stattgfunde. Yfrigi Junggardischte, zämme mit em Obmaa Emil Schifferle, hänn denn aber Dampf uffgsetzt und 1947 wider s’erscht Mool Fasnacht gmacht. Bis Hitte isch die Ketti nümme unterbroche worde.
D’Ladärne vo 1953 hett me übrigens em Museum für Völkerkunde an dr Auguschtinergass gschänggt und s’ussgstopft Goschtym vom Tambourmajor samt Stock isch sythär im ethnografische Museum in London usgstellt!
(Fascht) alli Sujets, wo die Jungi Garde emool kha hett:
1937 Dr verlore Schlüssel vom alte Zyghuus 1938 Professor Piccard taucht in die Tiefsee 1939 Film: Füsilier Wipf 1947 Dr Pfuus goht us 1948 D Bolizei bi de Häfelischieler 1949 Dr Flugibaschtler 1950 ? 1951 Kundefängerei mit Baleen 1952 ? 1953 Dr Profässerhirsch 1954 Wällesittich im Kaffi Sattler 1955 Myshokeykäsperli 1956 SBB Silveschterfahrt 1957 Pfahlbauerbaiz im Joggelibad 1958 Stänzlertschakko (Riehen) 1959 Guetschynfimmel 1960 Ausverkauf im Tessin 1961 Atlantischi Reise n1962 Sp(r)itzensport 1963 JG Kinderstube 1964 Die gmuggti DC-4 (vo Blootze) 1965 S Offiziers-Granz-Schiesse vo Sumpflige 1966 S Zyklope-Drämmli 1967 Was will dr Mobi Digg im Bach ? 1968 D Regrute-Volggshochschuel (vom Sigi Widmer) 1969 Dr Basler Dirgge-Duube-Danz 1970 S Gratiselet 1971 Juhui, Basel het wieder e Clara 1972 Na-na-na und heh-heh-heh – hesch das Gitter au scho gseh ? (Gitter im Stadion) 1973 Mr sueche s alt Basel 1974 Aadie Hitzeferie 1975 Dr laidig Bummel-Rummel 1976 Gsehn er au orange ? 1977 S’Zmorggedringge uf dr Blägg 1978 Uns bisst’s – eych au. D’Luusdante 1979 D Boscht-Spritz-Tour macht s Fifi suur. 1980 10 Johr Circus Basilisk 1981 S Gartezwärgli Festival 1982 Dr Volggsfrosch vo dr Klick-Klack-Bangg. 1983 ? 1984 E Basilisgg brinnelet z’Ziri 1985 Mi gröschte Traum, e Göttibaum 1986 Vision Fasnacht 2036 1987 100 Johr Freiheitsstatue 1988 Bi uns hett’s gfunggt 1989 E halb Johrhundert Eigerrummel 1990 20 Johr Mondspektakel 1991 Landsgmaind in dr Stadt 1992 Bisch au fir Gwalt, jo denn halt 1993 s’Pinsch au 1994 Reclams gsammleti Wärgg, Drämmliregglame 1995 Dr Zoo-(un)logisch Garte 1996 Kischte zügle, neus Untersuechigsgfängnis 1997 Jubelfasnacht 1998 MIR und s’Marsmobil 1999 Bärezunft im Glaibasel 2000 Mir sin dinn, MIR 2001 Big Brother 2002 Jetz sin mir am Zug, was mainsch. Jungi an d’Macht 2003 Spare 2004 Wotsch ain an Botsch du Dotsch 2005 Dr Hans dampft uss alle Löcher 2006 easydupfclub.ch 2007 Numme no Fasnacht mit Pass 2008 Mir sinn jung und primitiv ! 2009 Dr Urknall oder s’schwarze Loch 2010 Mir sinn sicher 2011 – 2023 ??
E baar Sujet hänn nümme könne ermittled wärde, bi Andere isch d’Joorzueteilig unsicher.
E baar Helgeli vo dr JG-Fasnacht 2019
Do sin schonemool d’ Zytte vo dr Fasnacht 2024
Mäntig, 19.2.2024, Morgestreich
03:40 Dräffpunkt Schneidergasse/Singerhaus, 04:45 Pausenhalt Stadtcasino, Barfi, 06:15 Morgenässe im DCB Käeller, 07:00 Abträtte im DCB Käller.
