Alti Garde

Die Alti Garde vom Dupf-Club isch Anno 2022 50 Joor alt worde!

Was wettsch über die Alti Garde wüsse?

Ganz kurz über die Alti Garde
Bi dr Alte Garde goht’s e weeneli gmietliger zue als im Stammverein. Grundsätzlig seit unsere Leitspruch «Mir mien gar nüt!». Das heisst aber nit, dass mir nit aggtiv sinn – im Gegedail: Mir hänn vyyl Aggtiviteete zämme, wo nüt eigentlig mit dr Fasnacht z’ tue hänn. D’ Kameradschaft wird bi uns nämmlig sehr hoch gschriibe!

Wär alles?
In die alti Garde ka-me ab em 40schte Altersjoor. In dr Regel (und am liebschte) diräggt uss-em Stammverein. Queryystyyger sinn aber au willkumme. Die mache eimool Fasnacht mit uns, bevor si definiv uffgnoh wärde.

Iebigsstunde: Immer am Zyschtig zoobe iebe-mer gmeinsam, also Pfyffer und Damboure zämme, im Käller vom Dupf-Club am Pfäffergässli 8.
Au wenn mir uns nümme unbedingt für Drummel- und Pfyffermeischterschafte dien aamälde – unseri Instrumänt wämmer trotzdäm guet spiile, und mir gänn uns – mit unsere beide ussgezeichnete Instruggtore – sehr mieh, denn au mir wänn am Cortège guet tööne!
Und das isch übrigens unser Repertoire (Stand Winter 2023)

Noh de Iebigsstunde blyybe mer immer no lang zämme und dien au no öbbis Feyns ässe, wo-n-ys dr Källermeischter bröötlet hett.

Koschte: Dr Club-Mitgliiderbytrag isch CHF 75 pro Joor, und unsere Fasnachts-Byytrag koschtet im Joor CHF 400, und do isch alles yygschlosse: Goschtüm, Larve (uss eigener Produggzion!), Zmorge am Morgestraich, Nachtässe am Fasnachts-Mändig und -Mittwuch.
Dr Bummel isch nit au no dinne, sonden koschtet de Teilnähmer separati 100 Frangge, inkl. Zmittagässe.

Unseri Statute kasch do aabelaade!

Intärn: Die Sytte isch numme für unseri Mitglieder, mit Informazione und Sache zem Aabelaade. Wägedäm halt Passwort-gschützt.